Algebra Useful Hai, Par Financial Literacy Essential Hai

 

Yaad hai school ke din jab math teacher board pe likhti thi Find X

Aur hum sochte the Madam pehle yeh batao X gaya kahan tha

Humne saalon tak algebra trigonometry aur calculus padhi. Lekin kisi ne yeh nahi sikhaya ki salary milne ke baad uska kya karna hai. Kisi ne nahi bataya ki credit card ka bill delay hone par kya hota hai ya EMI ka stress kaisa lagta hai. Hum numbers samajh gaye par paisa nahi.

Mujhe yaad hai meri pehli salary ka din. Account me paisa aaya aur excitement alag level ki thi. Do hafte ke andar sab khatam. Rent gaya, khaana gaya, chhoti chhoti cheezein sab milke balance zero. Tab samjha mujhe algebra aata hai par finance nahi.

Algebra numbers sikhata hai finance zindagi sikhata hai

School me hum angles nikalte the life me balance nikalte hain. Algebra batata hai X kya hai finance batata hai value kya hai. Hum formula yaad karte the a square plus b square par koi nahi batata tha formula for financial peace. Pythagoras theorem yaad rakhne se zyada zarurat thi yeh samajhne ki khud ko pehle pay karo baaki baad me.

Financial literacy sirf saving ka naam nahi hai. Ye samajhna hai ki paisa kaise kaam karta hai. Credit card ka limit tumhara paisa nahi hai. EMI ek comfort lagta hai par wo tumhare future ka control le leta hai.

Real world me koi formula nahi hota

School me test milte the real life me bills milte hain. Koi chapter nahi koi marks nahi bas experience milta hai. Maine dekha hai log achhi salary leke bhi broke hote hue. Reason simple hai paise kam nahi knowledge kam.

Ek dost ne mujhe bola tha bhai maine stocks me invest kiya ab neeche ja raha hai kya karu. Main bola tu ne kyu invest kiya tha. Usne kaha sab kar rahe the. Yehi problem hai hum trend follow karte hain logic nahi.

School ne sikhaya marks kamao kisi ne nahi bataya paisa sambhalo

Bachpan se hum sunte aaye padhai karo job mil jaayegi. Par kisi ne nahi bola finance samajh lo zindagi aasaan ho jaayegi.

Socho agar school me financial literacy subject hota. Hum seekhte interest kaise kaam karta hai tax kya hota hai inflation ka impact kya hai aur investment early start karna kyu zaruri hai. Jab maine khud se seekhna start kiya YouTube videos blogs aur trial and error tab samjha basic finance knowledge kitna powerful hota hai. Bas ye samajh lena ki SIP kaise kaam karta hai ya compounding kya hoti hai itna confidence deta hai jitna koi algebra equation kabhi nahi de sakta.

Bacchon ko kya seekhna chahiye

Bacchon ko pehle yeh sikhana chahiye ki credit card free paisa nahi hota. Unhe batana chahiye ki paisa bachaana punishment nahi ek skill hai. Unhe yeh samajhna chahiye ki need aur want me farq kya hai.

Agar school me yeh sikhaya jaata to aaj ki generation debt free hoti. Wo samajh paate ki rich hone ka matlab zyada kamaana nahi smartly sambhalna hai.

Life me financial lessons zyada hard hote hain

Exam me fail hue to next attempt milta hai. Paise me galti ki to fine penalty stress sab ek saath milta hai. Financial literacy tumhe control deta hai. Ye sikhata hai kab kharch karna hai aur kab rukna hai. Aur sabse important ye tumhe peace deta hai.

Main ek baar apni chhoti cousin ko SIP samjha raha tha. Wo 19 saal ki thi. Jab maine bataya ki 1000 rupees monthly invest karke wo future me lakhon kama sakti hai usne bola Bhaiya ye school me kyun nahi sikhate. Mere paas koi jawab nahi tha.

Bottom line

Algebra important hai lekin financial literacy zaruri hai. Math tumhe exam pass karwa sakta hai. Finance tumhe life pass karne me madad karta hai.

Agar hum chahte hain next generation sirf kamaaye nahi balki sambhale bhi to unhe paisa samjhana padhai jitna hi important hai. Teach them budgeting is not boring. Teach them saving is not sacrifice. Aur sabse important sikhao ki paisa banana asaan hai par usse bachake rakhna ek art hai.

Algebra batata hai value of X. Financial literacy batata hai value of life. Aur asli equation simple hai Income minus ignorance equals independence.